مجرد رقصه .. اه بجد ع فكره هى مجرد رقصة ، لما بتتحرك كده
وبتحس انك طاير فى الهوا على نغمات الكون الطبيعيه
المعزوفه بمنتهى الدقه والرقه
ياااه احساس جميل بتنسى فيه كل همومك وتعيشه هو وبس
على فكره مش انت بس اللى كده
الكون كله كده
بس لكل منا رقصته الخاصه بيه اللى تحسسه بالانتعاش ده
يعنى مثلا زمان فاكر لما كنت طفل وكنت بتقعد تعيط ومحدش فاهم انت بتعيط ليه بس بمجرد ماما متخدك فى حضنها وتقعد تهز تهز تلاقيك سكت لا وكمان كان فى اطفال مش بتنام غير بكده
عارف ايه كمان ،
الشجر ....
اه الرياح لما بتيجى وبتهز الشجر
الشجر بيتخلص من كل الورق الميت الدبلان اللى فيه
وبيعيد تكوينه بشكل اجمل وجاذبية اكتر
افكارك كمان محتاجه رقصه مجرد رقصه ...
هز فى افكارك ، حركها فى دماغك خليها تحس بالانتعاش
وقتها اكيد هتخرجلك حاجه جديده صدقنى
بس قبل متفكر فى جديد لازم تتخلص من الافكار القديمه الدبلانه ،
لازم تتخلص من همومك ...
انزل
اجرى
اتحرك
روح للنيل
البحر والرمل
الخضره والزرع
الكورنيش
ايون اجرى واتحرك
هتحس بطعم الحياه
اه فعلا طعم الحياه علشان تدوق منه
محتاج رقصه
مجرد رقصة ....